قصيدة القبة أم دهانا يرقو

القبة أم دهانا يرقو
***
كلمات الشيخ المادح خالد المصطفى
***

القبة أم دهانا يرقو ( يرقو = خضراء )
شوقي اليخاتف برقو

العشاق سكارى وغرقوا
في نار الهيام اتحرقوا
يوم جانا النسيم من شرقو
مسكا بل عطيرا عرقوا

غطى من الجنوب لي أرقو
كل سودان سريا وطرقو ( سريا : النهر والبحر )
كل هايم يراجع ورقو
لي بلاد الرسول انسرقوا

مبعوثا في بيت عربايا ( بيت عربايا = أرض العرب )
الهاشمي الصميم الآيه
يا محبوبي يا ملجاي
دنيا وآخرة إنت رجايا

شفاعتك سوبتو يوما جايه ( شفاعتك سوبتو = عيد الشفاعة )
بي أوزارنا بيكا نجايا
نورك كان ختام وبدايه
يا أكرم صفات وسجايا







مبعوث من هدية أودو ( أودو = الواحد الأحد )
لي كل من سكن في بلودو
راحم بيهو كل وجودو
حريصا مستقيم وسجودو

يا رحمن رحيم وودودو
في زوم الكريمة جدودو ( زوم = البقعة )
نجلس آمنين في حدودو
في ساحة الحبيب وورودو

سابار الرسول ونبيا ( سابار = بشر )
مرسولا لأمه أبيه
يرووا ليه أنس وأبيه
معصوم من نشا وصبيا

للعالم خلاص وهديه
سيد السودورو والكوفيه ( السودرو = العمامة )
حقوقك لينا كيف نوفيا
يا صافي الحسب والنيه

الكون من مدودك شاري ( شاري = يبدأ )
تشريف الكريم الباري
دايما لينا فيضك جاري
ضايق في بعادك ناري

يا الصاحب تميم الداري
دايما موريو في أفكاري ( موريو = سيدي )
يا رب طيبات أقداري
بي الفاق من أقام جدار








يعبد ربو في الحايوسو ( الحايوسو = الغار )
الغير للمعاصي يكوسوا
جبريل منهجو ودروسو
محفوظ من لعين محروسو

نتسامر ونيحا جلوسو ( ونيحا = مرتاحين )
في ظل القمر وشموسو
مرتاحين حديثنا هموسو
ما فينا البغيض وعبوسو

يا ريت لأم خدار ساعورا ( ساعورا = زائرين )
زي أسراب حمام وطيورا
ارابط فيك سنين وشهورا
وبي نورك أقيف مبهورا

يا ريت في الكتاب مسطورا
في اللوح بل قدر مقدورا
خالد يمشي ليها يزورا
ويصلي على نبيك النورا